慎重警告！除非你係好中意柴崎杏，或者江口洋介，或者張雨綺，或者肥仔聰，或者田雞... 否則你千祈千祈唔好入戲院睇「少林少女」......( >﹏<''')

極速賽車手好~好~睇，誠意推介！但係好似落左畫喇wor...

小弟6月8號就飛日本喇。東京東京~ 我黎緊喇~!!（一個破費之旅 a money-breaking trip）

教會是我家，呢幾日連續返教會，由星期六晚帶同事去佈道會，星期日崇拜，夜晚又返教會睇非洲Watoto音樂會，到星期一晚就返去練歌，黎緊星期三又返團契喇。

星期日蘇牧師講道，提到好重要既一點︰有傳道冇神學既教會係「弱既教會」，根基不穩，宜家有好多教會都係咁既情況。而有神學冇傳道既教會就更加係「死既教會」，法利賽人就係呢一種。所以要建立有神學又有傳道既教會（一世紀教會就係咁啦），甚至每一個門徒o係成長路入面都應該讀神學，因為主既大使命話「凡」我所教導的，都教訓「他們」（萬民）遵守。所以我都決定幾年內會讀神學，裝備好自己去事奉主同有需要既人，尤其教會入面本身已經有神學學位課程讀，就應該珍惜機會。我一直以黎都冇諗過讀神學同全職事奉，但係o係呢個各樣異端邪說冒起既時代實在有好大既需要。

夜晚可以有機會睇Watoto既音樂會真係好正，香港人同非洲人一齊唱頌神真係感動，見到神既愛真係好大，亦見到神係世上萬民既神。同事都有黎，可惜佈道會好似唔係好幫到個同事，但係都盼望佈道會加上Watoto音樂會既經歷可以o係佢既心入面播下福音既種子，有一日可以發芽結果啦。

敬拜隊練歌好辛苦！d歌好低音，唱死我，因為d歌既音主要就女仔，男聲就係女聲既低八度，對我呢個唱慣男高音既人真係一項挑戰，而且又要同樂器鬥聲量，最後唱到把聲都變變地...但係好開心更表已經出左，我可以五月尾去青少部既崇拜唱。而且今個星期團契敬拜晚會既第一首歌玩晒冷，我都有份唱下和音，都係好興奮既。

參加左團契既Praise Team之後，經歷左兩次練歌，感覺好好。整體上係覺得佢地對歌唱敬拜既每一部分都準備得好認真同埋有心。每次敬拜唔係求其揀幾首歌，務求火熱同唔悶就算，而係貼近每次要帶出既主題，令大家可以透過詩歌深入體會同了解一d信徒要明白既道理，例如係基督既復活（因為近復活節）。唔係只係要求大家一齊去唱，而係希望歌詞所帶出既意思能夠對大家有幫助。而且整個敬拜唔係只係不斷咁唱歌，仲有安排左適當既經文同埋禱告去配合，令到成個敬拜出黎既效果可以更完全。另外係練歌方面，著重既係要做到唱到歌本身既感覺出黎，唔係唱arm d音同拍子、夠氣就夠。呢方面都對我大有幫助。而除左係訓練同練習，練歌時間仲著重當中既經歷。出黎練習唔係business既事，唔係責任咁簡單，大家走埋一齊練歌係一個額外可以敬拜神既時間，大家透過詩歌可以經歷神，有人仲係練歌既時候感動到喊添！見到大家對呢個事奉咁認真，亦好倚靠神去做，我自己都被感動。暫時仲未可以上台唱，希望可以快d啦。

其實我地可以被神允許去事奉佢係一份榮幸，所以應該好認真咁去做呢個事奉。坦白講，如果我覺得唔需要咁認真去看待事奉既機會，神亦唔需要我去做。另外傳道人話，事奉唔係只係o係台上負責唱歌既時候，練習都係事奉既一部分，所以練習時間好重要。而且其實我地基督徒既事奉應該係每一日活出合神心意既生命。做到「生命敬拜」，讓自己每一日都可以當作馨香既活祭獻畀神。

分享少少近況。前幾日面對自己既一d問題同埋軟弱，自己真係冇力改變同解決，好體會到保羅講果種︰自己知道咩係唔好，「唔想」自己係咁，但係就偏「想」去行。但係在人是不能，在神真係凡事都能。我係掙扎之下同神講，容我今日改變唔到，但係希望聽日可以完全改變，係心思上既改變，因為神有能力改變人心。結果到第2日，我就真係改變左，真係好~神奇。

團契識既人越黎越多，越黎越warm，越黎越渴望去返團契~ 但係下個week竟然冇團契，oh no!!!~

星期六夜晚既佈道會潘曉輝弟兄既見證分享真係好好。佢係20年前係陸運會被標槍插中右腦既人。當時既佢冇番過教會、未信神。但係係佢昏迷既途中，佢夢到佢飄浮，佢知道佢既靈魂離開左肉身。佢見到街上既人，但係街上既人見唔到佢，d人都聽唔到佢講野。佢去到一個比較空曠既地方，嘗試呼求真神幫助佢，雖然佢唔知邊個係真神。但之後就有一道光射向佢，佢飛入去光源果度，就去到一個好靚既地方。果度有一團大光，係光既面前，佢就好似螞蟻一樣咁細。佢問光係邊個，光回答︰「我係你搵果位真神。」佢再問光即係邊個，光回答︰「我叫耶和華。」果一刻佢終於知道原來基督教既神先係真神。之後，一幅幅佢過去既片段係佢面前飛過，唔止見到，連片段當時佢腦入面諗既野同埋感覺佢都feel得到。神同佢講佢要返去有事要做，佢就醒左喇。夢入面過左5分鐘，但現實之中佢已經昏迷左23日。經過呢次經歷，佢主動睇聖經同信主。宜家佢雖然殘障，但係內心充滿喜樂同盼望，到處為主作見證。佢既見證都建立左我好多信心。

另外，我都有d唔開心點解有人要散佈我離開COC既原因既謠言，事實上散佈謠言係罪，基督徒更加唔應該做。雖然我好希望關心我轉教會既人不如直接搵我去了解，愛唔應該被隔絕既，但係我都係度澄清︰我轉去恩福堂只係因為我覺得果度所講既信仰較為正確、可信、更加幫到自己，並冇任何其他原因。我講既係事實，希望我既朋友都相信我，唔好信d謠言，至少要先了解傳言既真偽。

對於聖經所載既「因信稱義」，COC同福音派教會既見解係唔同，但係我地應該去了解聖經點講。羅馬書4章說明亞伯拉罕因信稱義，講到佢稱義唔係因為佢既行為，而只係因為佢「在行為以外」既信。靠行為而得既唔算恩典，藉著信白白由神所賜既先至係恩典。「人得為後嗣是本乎信、因此就屬乎恩，叫應許定然歸給…那效法亞伯拉罕之信的」說明左神得救既恩典係憑信而可以得著。「也是為我們將來得算為義之人寫的，就是我們這信神使我們將信耶穌從死裡復活的人。耶穌被交給人，是為我們的過犯；復活，是為叫我們稱義」呢段經文更指出使人得義既信係指信耶穌已經完成左整個救贖過程，使我地脫離罪、得以稱為義，而我地只需願意接受（信）就可以得著。而且聖經強調亞伯拉罕係受割禮之前已經稱義，所以唔係割禮令佢稱義。「叫他作一切未受割禮而信之人的父，使他們也算為義」。同樣，神既心意究竟係咪要我地藉洗禮稱義呢？定係「一切未受水禮而信的人也算為義呢」？既然聖經寫得咁明白，我地點解寧願懷疑都唔相信呢？因信稱義唔係指基督徒聲稱自己信就唔駛活出門徒生命，因為聖經都話沒有行為的信心是死的，所以行為係真信心既表徵。但要小心變左「行為稱義」，呢樣野就一定唔係聖經所教既。

我寫呢d唔係要大家改變信仰，而係希望大家會去反思下自己所信既野。

今日係耶穌受難節，即係耶穌二千年前被釘十字架死去既日子，係一個好值得基督徒記念既日子。教會好好，亦好重視呢個節日，係呢幾日都搞唔同既野去等基督徒去記念呢個日子。今朝自己一個人返教會參加禱告會，一如所料，得好少人參加。雖然有少少掙扎，但係自己都好想參加，因為身為一個基督徒，都好想重視呢一個節日，盡自己既本分去記念同與主經歷佢既受苦同受死。係教會裡面模擬去走耶穌走向各各他既苦路，一邊走一邊唱「靠近十架」。雖然可惜自己唔係出生係耶穌時代，但係都可以略略感受到當中既感受。今日最叫我明白既係自己對主同埋對信仰既投入，係唔應該單單係習慣上同埋係其他人面前先有既，而係當冇人睇到既時候都應該對神虔誠既。而係人面前，就更加唔應該怕別人既眼光而收起對神既表達。唱歌就大聲唱、有感動就去喊、軟弱時就承認軟弱、有回應就開聲。唯有咁樣先至可以真正得著主，因為眼目係放係天上（神）而唔係地上（人）。

係18樓禱告既時候心裡面見到一幅屬靈既景象，我見到有一個人拿住好多紙，每一張寫住既係一個人既罪，而耶穌就好痛苦咁跪在地上。當耶穌大聲話︰「xxx！我願意承擔你既罪！」佢就立即受到鞭打！條鞭好粗，耶穌都好痛苦。而鞭打之後，果個人就將果張罪狀撕毀，再換上另一個人既罪狀，而耶穌又再大聲話願意承擔果個人既罪，又再被打。一直咁樣落去，耶穌為我地每一個人承擔我地所犯既罪…  我見到呢個景象真係有d驚！我知道耶穌都有讀我個名，係我仲未出生既時候已經為我既罪受苦。無論我知唔知道，佢已經主動將我既罪攬左上身，但其實將來真正要受苦既人應該係我至arm！我終於知道原來耶穌受士兵鞭打、苦待，甚至被釘既背後，佢其實係咁樣去用佢既痛去幫我地每一個世人贖罪既。所以我要衷心講︰「主啊，Hallelujah，你係配得讚美既！」